Үлбі көтерілгенде әбігерге түсіруі мүмкін – Жақсылық Омар
Өскемен аумағында қарғын судың алдын алу жұмыстары қарқынды жүріп жатыр.
Шаһар басшысы Жақсылық Омар Үлбі өзенінің бойындағы тасқынға қарсы шараларды тексеріп қайтты, деп хабарлайды Altainews.kz тілшісі.
Ертіс пен Үлбі өзенінің суы көтерілгенде су басуы мүмкін бірнеше жер бар. Соның бірі - Бабкина мельница шағын ауданында орналасқан көпір маңы. Қазір мұнда өзен жиегіне тас төгіліп, жағалауы биіктетілген. Қала тынысын барлауға шыққан әкім тасқынға қарсы дайындықты тексеріп, қауіпті аймақтарды аралап қайтты.
- Өскемен - су басу қаупі жоғары қаланың бірі. Себебі, шаһар таудың етегінде орналасқан. Таудан еріген судың барлығы қала ішімен өтетін Ертіс пен Үлбіге келіп қосылады. Өзендердің деңгейі көтерілгенде су басуы мүмкін бірнеше қауіпті аймақ бар. Соған байланысты қазір белгіленген жерлерде өзен жиегін биіктетіп, қиыршық тас төгіп жатырмыз. Бөгеттің биіктігі 5 метрге дейін жетеді. Қала маңындағы тегіс аймақтардың қары негізінен еріп бітті. Енді негізгі суды тау жақтан күтіп отырмыз. Үлбі өзенінің деңгейі көтерілсе, біраз әбігерге түсіруі мүмкін.Сондықтан қарғын судың кесірі халыққа тимесін деп осы жұмыстарды атқарудамыз. Үлбі өзеніндегі су деңгейін бақылауда ұстайтын боламыз, - деді қала әкімі.
Қала маңындағы өзен жиегінде тасқынға қарсы ұзындығы жарты километр болатын, биіктігі бес метрден асатын сегіз бөгет салынған. Жағалауы көтерілген жерлердің барлығы - су басуы мүмкін деген қауіпті аймақтар.
Оқи отырыңыз
