Мәжіліс Қазақстан Республикасы Үкіметі мен Америка Құрама Штаттары Үкіметі арасындағы Алматы қаласында АҚШ консулдық мекемесінің ғимаратын салу үшін жер учаскесін жалға беру туралы келісімді ратификациялау жөніндегі заң жобасын қабылдады, деп хабарлайды Altainews.kz тілшісі.

Осылайша, мәжіліс депутаттары биіктігі 22 метр болатын жаңа консулдық ғимараттың құрылысына рұқсат берді. Алайда, Алматыда Әл-Фараби даңғылының оңтүстігінде үш қабаттан немесе 12 метрден биік ғимараттар салуға тыйым салынған. Бұл туралы Алматы қаласы мәслихатының VIII шақырылымының XXVI кезектен тыс сессиясының 2024 жылғы 25 желтоқсандағы №193 шешімінде көрсетілген. Құжатта: «Әл-Фараби даңғылының оңтүстігінде орналасқан ғимараттардың параметрлері барлық құрылыс түрлері үшін ең көп дегенде үш қабат және жертөле қабатымен шектелуге тиіс. Жалпы биіктігі 12 метрден аспауы керек. Денсаулық сақтау, білім беру, мәдениет және діни нысандардың құрылысына ғана ерекше жағдай жасалады, бірақ олардың биіктігі 25 метрден аспауға тиіс» делінген.

Мәжіліс отырысында консулдық ғимаратына берілген рұқсаттың қала құрылысы ережелеріне қайшы келетіні, бұл шектеулердің сейсмикалық қауіп-қатерлер мен жер қыртысының ерекшеліктеріне байланысты енгізілгені айтылды.

Сыртқы істер министрлігінің өкілі консулдық ғимаратының биіктігі 22 метр болуына құрылымдық ерекшеліктер себеп екенін түсіндірді. Оның сөзінше, бұл көрсеткіш ғимараттың негізгі қабаттарынан емес, лифт шахталарының күмбездері мен байланыс жабдықтары сияқты қосымша элементтерден құралған.

Келісімге сәйкес, АҚШ үкіметіне 70 593 шаршы метр аумақ 49 жылға жалға беріледі. Жер телімінің жалға алу құны 25 301 016 АҚШ долларын құрайды және бұл қаражат келісім күшіне енген күннен бастап 30 күн ішінде бірреттік төлем ретінде төленуге тиіс.

Бағадағы айырмашылық назар аудартады
Мәжіліс депутаты Асхат Рахымжанов бұл келісімнің негізінде 2002 жылы АҚШ-тың Астанадағы дипломатиялық өкілдігін салу үшін жасалған келісім бар екенін атап өтті.

2003 жылы қол қойылған меморандумға сәйкес Қазақстан Үкіметі АҚШ-қа Астанадан 8,614 гектар жерді 49 жылға жалға берген. Бұл үшін АҚШ бірреттік 300 000 доллар төлем жасаған. Қазіргі Алматыдағы консулдық үшін бөлінген жердің аумағы Астанадағыдан сәл ғана кіші (7 гектар), алайда жалдау ақысы 25 миллион долларды құрап отыр, бұл 20 жыл бұрынғы келісіммен салыстырғанда айтарлықтай жоғары.

Құжаттарға сәйкес консулдық ғимаратын салудың бас мердігері америкалық компания болады. Сонымен қатар шетелдік дипломатиялық өкілдік құрылыс барысында АҚШ-та өндірілген материалдарды, жабдықтарды және тауарларды пайдалану құқығына ие.

Фото: Андрей Дудник