Қазақстанда 2023-2024 оқу жылынан бастап жоғары сынып оқушыларына жұмысшы мамандығы біліктілігін беру бойынша пилоттық жоба жүзеге асуда, деп хабарлайды Altainews.kz тілшісі ҚР Оқу-ағарту министрлігіне сілтеме жасап.

Бастама елдің 17 өңірінде іске қосылып, жергілікті бюджет есебінен қаржыландырылуда. Бұл мектептегі білім беру жүйесінің практикалық бағытын күшейтіп, жастарға еңбек нарығына ерте араласуға мүмкіндік береді.

Оқу үдерісі колледждер мен мектептерде қатар жүргізіледі: жалпы білім беру пәндері мектепте оқытылса, кәсіптік даярлық колледждер базасында өтеді. 11-сыныпты бітірген түлектер орта техникалық білім туралы диплом алады.

Пилоттық жобаға 150-ге жуық колледж бен мектеп қатысуда. Оқушылар тамақтануды ұйымдастыру, автокөлікке қызмет көрсету, тігін өндірісі, киім дизайны, графикалық және мультимедиялық дизайн, дәнекерлеу, жиһаз өндірісі, шаштараз қызметі сынды еңбек нарығында сұранысқа ие бағыттарды меңгеруде.

Қазіргі таңда жобаға 2 мыңға жуық оқушы қатысып жатыр, ал биыл 905 түлек кәсіби біліктілікпен қатар колледж дипломын алып шығады. Бұл бастама техникалық және кәсіптік білім беру жүйесін жаңғырту және экономиканың нақты секторына қажетті білікті кадрлар даярлау мақсатында іске асырылуда.