Күршім ауданында өңірдің әлеуметтік -экономикалық дамуын арттыру бағытында жоспарланып отырған  іс-шаралардың қатарында ауданда тиімді туристік жобаларды  жүзеге асыру да бар, деп хабарлайды Altainews.kz тілшісі.

Аудан әкімі Алмат Ақышов Күршімде ішкі туризмді дамытудың мүмкіндіктері мол екенін айтып отыр.

Күршім жері әлемнің «сегізінші кереметі» саналатын табиғи ескерткішімен  әйгілі. Қазіргі күні ғажайып мекен Қиын-Керіш шатқалын туризм нысаны ретінде дамытып, қорғап, қоршау үшін инвестор іздестіріліп жатыр.

Аудан әкімінің айтқанындай, қызыл топырақты, құлама жарлардан тұратын табиғи ескерткішті сақтап, қорғау үшін алдымен ол жер қоршауға алынбақ. Әйтпесе, миллиондаған жылдарда түзілген «жалынды жар» бір-ақ жылда қирап, жоғалып кетуі мүмкін. Аумаққа кірудің тәртібі реттелмек.  Өткен жылы Қиын-Керішке туристерді әкелумен үш компания айналысқан көрінеді. Демалушылардың мотоциклмен Қиын - Керіштің үстіне шыққаны туралы фактілер де болған екен. Табиғатқа деген мұндай тағылық көзқарасқа тосқауыл қою үшін биыл Қиын - Керішті қоршау жұмыстары қолға алынбақ.