Шілікті ауылы Шығыс Қазақстан облысындағы Зайсан ауданында орналасқан және 2003 жылы табылған үшінші «Алтын адаммен» танымал. Бұл тарихи маңызды ауылдың тұрғындары интернетке қол жеткізе алмай отырғанына шағымдануда,- деп хабарлайды Altainews.kz тілшісі Kazinform.kz сілтеме жасап.

Ауыл халқының айтуынша, биыл интернет тарту жұмыстары басталғанымен, ол аяқсыз қалған. Тұрғындардың бірінің айтуынша, 15 шақырым қашықтықтағы жерге электр бағаналары орнатылып, тау басына мұнара қойылған, бірақ жұмыстар тоқтап қалған. Әкімдік өкілдері интернеттің қыркүйек айында қосылатынын уәде еткен, алайда ол орындалмаған.

Шілікті ауылдық округінде 360 үйде шамамен 1500 адам тұрады, және бұл мәселе тек осы ауылдың ғана емес, басқа елді мекендердің де басты проблемасына айналған. Жергілікті тұрғындар әкімдікке бірнеше рет хабарласқанымен, нақты жауап ала алмаған.

Зайсан ауданы әкімінің орынбасары Данияр Серіковтың айтуынша, интернет 2025 жылы ғана қосылмақ. Биыл Шіліктімен қатар, Тасбастау және Жаңатұрмыс ауылдарына да мұнаралар орнатылған, бірақ толық іске қосу кейінге қалдырылған.

Облыстық цифрландыру және архивтер басқармасының мәліметі бойынша, аймақтағы 155 ауыл әлі күнге дейін интернетсіз отыр. Бұл елді мекендерде халық саны аз болғандықтан, байланыс операторлары жабдық орнатуды тиімсіз деп есептейді. Сондықтан 2027 жылға дейін кезең-кезеңімен барлық ауылдар интернетпен қамтамасыз етілмек. 2024 жылдың басынан бері 29 ауылға интернет тартылып, 148 мектепте Starlink спутниктік интернеті орнатылған.

Тұрғындар интернетке қол жеткізу үшін әлі де күтіп отыр, бірақ үміттерін үзген жоқ.