Шығыс Қазақстан облысында көктем келісімен мұз үстіндегі қауіп күшейе түсті. Осыған байланысты ШҚО Төтенше жағдайлар департаментінің қызметкерлері балықшылар мен тұрғындарға мұзға шығудың қауіпті екенін ескертіп, түсіндіру жұмыстарын жүргізуде.  

Көктемгі мұздың қауіптілігі қандай?  

ШҚО ТЖД бастығының орынбасары Исхар Савазовтың айтуынша, көктемде мұз серпімділік қасиетін жоғалтады. Ол бірден жарылып кетпейді, бірақ кенеттен бөлініп, адам өміріне қауіп төндіруі мүмкін.  

Қазіргі уақытта облыста 200-ден астам профилактикалық рейд жүргізілді. Мамандардың мәліметінше, мұздың түсіне қарап оның беріктігін анықтауға болады. Егер мұз сұр немесе кеуекті болса, ол кез келген сәтте опырылып түсуі мүмкін. Сонымен қатар, ағыс бар жерлерде, терең аймақтарда, көпірлердің астында және өсімдіктер өскен су айдындарында мұз жұқа болады.  

ШҚО ТЖД өкілдері көктемде автокөлікпен мұзға шығу өте қауіпті екенін ескертеді.