Субсидия, маман, мал дәрігерлік қызмет... аймақтағы ауыл шаруашылығы өндірушілерін қандай мәселелер толғандырады?
Шығыс Қазақстан облысына іссапармен келген Парламент Мәжілісінің депутаты, «Respublika» партиясының төрағасы Айдарбек Қожаназаров облыстық кәсіпкерлер палатасында ауыл шаруашылығы саласының өкілдерімен кездесті, деп хабарлайды Altainews.kz тілшісі.
Кездесуде «Восток молоко» ЖШС басшысы Сейілжан Сайлаубаев, облыстық кәсіпкерлер палатасы өңірлік кеңесінің төрағасы, «Майлы дақылдар тәжірибелік шаруашылығы» ЖШС-нің бас директоры Фарид Әбітаев, облыстағы шаруа қожалықтары қауымдастығының төрағасы Самат Қыдырмолда, кәсіпкер Біржан Ерболат және басқа да ауыл шаруашылығы саласының өкілдері Мәжіліс депутатына өздерін толғандырып жүрген мәселелерін, саланы дамытуға, өркендетуге қатысты ұсыныс, пікірлерін жеткізді.
Отандық сүт өнімдерінің көршілес елдерден ағылып келіп жатқан арзан өнімдерге бәсекелес бола алуы үшін ауыл шаруашылығындағыларға: өндірушіге де, өңдеушіге де өнімнің өзіндік құнын төмендететіндей тиімді жағдай жасалуы керек. «Восток молоко» ЖШС-нің басшысы Сейілжан Сайлаубаев сүт өңдеу кәсіпорындарына, ауыл шаруашылығына бөлініп отырған қаржылай қолдау көлемін арттырып, ветеринария саласын дамыту қажеттігіне, саладағы маман тапшылығына назар аудартты.
Еліміздің ауыл шаруашылығының, оның ішінде Шығыс Қазақстанның ауыл шаруашылығының әлеуеті жоғары. Шығыста еліміздегі орман қорының 60, су көздерінің 40 пайызы бар. Соған қарамастан облыста бір комбайны жоқ аудандар да бар екен. Аудандағы ауылдарға ат ізін салмайтын, ауылдардағы шаруашылық құрылымдарына бармайтын, оларға қандай қолдау, не керек екенін білмейтін әкімдер, ауыл шаруашылығы бөлімдерінің басшылары бар. Осылай деген облыстағы шаруа қожалықтары қауымдастығының төрағасы Самат Қыдырмолда, әр аудан әкімімен, аудандардағы ауыл шаруашылығы бөлімдерімен бірлесіп ауыл шаруашылығын, оның ішінде мал, егін шаруашылығын өркендетудің жоспарлары, бағдарламалары әзірленіп, қауымдастықтың бастамасымен әр ауданда «Ауданды дамытудың тұжырымдамасы» жасалып жатқанын, сондай -ақ аймақта, елімізде ауыл шаруашылығын өркендетуге, ауыл шаруашылығына несие берудің шарттарын, тетіктерін өзгертуге қатысты Парламент қарауына бірнеше ондаған ұсыныс жолданып жатқанын тілге тиек етті.
Парламент мәжілісінің депутаты Айдарбек Қожаназаров бұл мәселенің Экономика министрлігінде көтерілгенін, дәл бүгін болмағанымен алдағы уақытта елде қазақстандық қолөнер шеберлерінің, қазақстандық кәсіпорындардың өнімін саудалауға тиімді жағдай туғызылатынын айтты.
