Брюссельде өткен форумның ашылу салтанатында Қазақстанның Көлік министрлігі мен Еурокомиссия кездесулерінің тұрақты негізде ұйымдастырылып тұратыны айтылды, деп хабарлайды  Altaynews.kz сайты Zakon.kz порталына сілтеме жасап.

Көлік министрі өз сөзінде форум қатысушыларына Еуропа мен Орталық Азия арасындағы жүк транзитіндегі елдің шешуші рөлін атап өтіп, Қазақстанның көлік саласының жетістіктері мен даму перспективалары туралы ақпарат берді. Сондай-ақ жүк айналымы озық қарқынмен өсіп келе жатқанына да тоқталды.

Мысалы, өткен жылдың қорытындысы бойынша тек ҚХР-мен транзиттік тасымалдар 2 есеге өскен, ал транзиттің жалпы көлемі 43% артқан. Марат Қарабаев қазақстандық аумақтарды Еуропа мен Азия арасындағы негізгі және орнықты транзиттік бағыт ретінде пайдалануды ұсынды.

Көлік министрлігінің басшысы таяудағы 5 жылда көлік саласындағы негізгі инфрақұрылымдық жобаларды іске асыру үшін Қазақстан 40 млрд еуроға инвестиция тартуға ниетті екенін айтты.

Теміржол саласында ұзындығы 1300 шақырым жаңа магистральдық бағыттардың құрылысы және қолданыстағы инфрақұрылымды жаңғырту жұмыстары жүргізіледі деп күтіліп отыр. Аталған жұмыс Азия мен Еуроодақ арасындағы өткізу қабілетін бірнеше есе арттыруға бағытталған.

Азаматтық авиация саласында саланы дамыту және континенттік транзиттік хаб құру үшін инвесторларға отандық 22 әуежайды басқаруға беру жоспарланған.

Ақтау портында теңіз флотын нығайту және контейнерлік хаб құру үшін инвесторларға терминалдық қуаттарды дамыту үшін 171 га ұсынылады. Сонымен бірге Ақтау және Құрық теңіз порттарын ship-or-pay шарттарымен сенімгерлік басқаруға беру мүмкіндігі де қарастырылып жатыр.