Жексенбілік мектептер еліміздегі әр ұлт өкілдерінің өз ана тілін, тарихы мен дәстүрін терең тануға, сонымен қатар мемлекеттік тілді тегін оқып-үйренуге барынша жағдай жасап келеді. Өскемендегі «Эдельвейс» қонақ үй кешенінің мәжіліс залында «Жексенбілік мектептерде қазақ тілі мен ұлттық (ана) тілдерді жеделдете оқытудағы әдіс, тәжірибе, инновация» тақырыбында республикалық семинар-тренинг өтті.

Семинар этномәдени орталықтар жанындағы жексенбілік мектептерде қазақ және ана тілдерін оқытудың әдістемесін жетілдіру, озық тәжірибені зерделеу және қорыту, оқытудың инновациялық әдістері мен технологияларын тәжірибеге енгізу мақсатында ұйымдастырылған. Аталмыш шараға Ш.Шаяхметов атындағы тілдерді дамытудың республикалық үйлестіру-әдістемелік орталығының директоры, филология ғылымдарының кандидаты Ербол Тілешов, «Мемлекеттік тілді үйрету элиталық курсы» мәдени мекемесінің директоры Сәуле Бақтыбаева, Көптілді білім беруді дамыту орталығының директоры, доцент Сәуле Асанбаева, әдіскер ғалымдар, тіл мамандары мен жексенбілік мектеп оқытушылары қатысты.

-Елбасы жүргізіп отырған мемлекеттік саясаттың арқасында елімізде Қазақстан халықы Ассамблеясы жұмыс істейді. Жексенбілік мектеп мұғалімдеріне арналған бұл семинардың мәні зор. Шеберлік сабақтарындағы әдіс-тәсілдер мен озық тәжірибелер оң нәтижесін береді деп сенемін. Мемлекеттік тілді білетін, сыйлайтын халыққа айналсақ, еңбегіміздің жемісі сол болмақ,-деді Ербол Ердембекұлы.

Семинар барысында әдіскер - ғалымдар тілдерді оқытудың тиімді әдіс-тәсілдерімен және технологияларымен бөлісті. Жексенбілік мектеп оқытушылары мен республикаға белгілі үздік әдіскерлер панорамалық және шеберлік сабақтарын көрсетті.

Сондай-ақ, қазақ тілімен қатар корей, өзбек, дүнген, грек, түрік, әзірбайжан, балқар тілі мұғалімдерінің қарқынды оқытуда интербелсенді әдістерді қолдану және оқытудағы инновациялық технологиялар жайлы баяндамалары тыңдалды.

-Мен Тараздағы №4 мектепте өзбек тілі мен әдебиетінен және 1996 жылдан бері жексенбілік мектепте мемлекеттік тіл-қазақ тілімен қатар тәжік, өзбек тілдерінен сабақ беріп келемін. Мұндай семинар-тренингтердің біз үшін маңызы зор. Тіл білімі саласындағы білікті мамандармен кеңесеміз, өзге өңірлердегі жексенбілік мектептердің ұстаздарымен сұхбаттасып, тәжірибе алмасамыз. Түрлі шеберлік сабақтары өтіп жатыр. Әр адам өз ұлтының тілін, мәдениетін білуі тиіс. Жексенбілік мектепте тіл үйренем деушілердің жасына шектеу жоқ. Тек мектеп оқушылары ғана емес, ана тілін терең білгісі келетін ересектер де келеді,-дейді тараздық ұстаз Ұлболсын Хадырбаева.

Елімізде бір шаңырақтың астында тату-тәтті өмір сүріп жатқан барша ұлттар мен ұлыстардың тілі мен мәдениетін сақтау үшін мемлекет тарапынан мүмкіндігінше барлық жағдай жасалған. Интеграция мен жаһандану заманында тіл саясатын жүзеге асыруда, үштілділікті дамыту бағытында нақты шаралар жүзеге асырылуда. Осы орайда Өскемендегі «Возрождение» жексенбілік мектебінің жұмысын ерекше атап өтуге болады. Мемлекеттік тілмен қатар тоғыз тілді тегін үйренуге мүмкіндік беретін, өзінің жеке ғимараты мен жарғысы бар бұл білім ордасы – республикадағы ең мықты жексенбілік мектептердің бірінен саналады.