Семей қаласының Шәкәрім атындағы мемлекеттік университетінің 1-2 курс студенттері арасында «Елбасы - ел тірегі» атты жас ақындардың жыр мүшәйрасы өтті. Жыр бәйгесін ұйымдастыруға университеттің Студенттік Парламент белсенділері мен тәрбие жұмысы және жастар саясаты бөлімі мұрындық болды.

Аталған жыр додасында 16 студент өз өнерлерін ортаға салды. Жыр мүшәйрасына қазылық еткендер: «Семей халықтық ақындар орталығының» жетекшілері - Дәметкен Омарбаева және Серік Молдабеков, Шәкәрім университетінің Тәрбие жұмысы және жастар саясаты бөлімінің маманы Мақсат Серікұлы, Студенттік Парламент спикері Айдос Төлеуханов, сондай-ақ қалалық және республикалық байқаулардың жеңімпаздары Арман Шеризатов пен Қуаныш Нұржанов.

Ақындар байқаудың бірінші бөлімінде Елбасыға арнау өлеңдерін, екінші бөлімінде еркін тақырып бағытындағы шығармаларын тарту етті. Орақ тілді, от ауызды ақындардың шабысын бақылаған әділқазылар алқасының шешімі бойынша, бас жүлде филология факультетінің студенті, жас ақын Ахмер Біржанға бұйырса, 1-орынды 1-курс студенті Құрманғажы Ерсін қанжығасына байлады. Жыр додасына қатысқан барлық жеңімпаздар дипломдармен марапатталды. Жас ұрпақты отансүйгіштік пен ұлтжандылыққа тәрбиелеу мақсатында ұйымдастырылған жыр додасы Шәкәрім университетінде жыл сайын өткізілетін дәстүрлі шараға айналды.