Өскемен қаласында ата-анасының қарауынсыз жол бойында ойнап жүрген 7 жастағы қыз бала көліктің астына түсіп, қайтыс болды, деп хабарлайды Altaynews.kz тілшісі.

Облыстық жол полициясында хабарлағандай, қайғылы оқиға Аблакетка шағын ауданында орын алған. ГЭС-тен қалаға қарай келе жатқан «Тойота-Камри» автокөлігінің алдынан кенет қыз жүгіріп шыққанда, жүргізуші тежегішке басып үлгермей қалған. Қатты соққы алған бала оқиға болған жерде көз жұмды.

Жол сақшыларының сөзіне қарағанда, бақытсыз жағдай ең алдымен ата-ананың балаға дұрыс бақылау жасамауынан болды. Кішкене қыз жол бойында үлкендердің қарауынсыз ойнап жүрген. Қазір белгілі болғандай, №14 мектептің 1-сыныбында оқыған зардап шегушінің отбасы қолайсыздар қатарына жатқан көрінеді. Қыздың шешесін ата-ана құқынан айыру жөнінде сөз де қозғалыпты.

Қазір жол-көлік оқиғасына қатысты қылмысты іс қозғалды, 1962 жылы туған жүргізушіден басқа жаққа кетпеу жөнінде қолхат алынды.