Биыл ірі жобаларды қолдауға 100 млрд теңге қаржы бөлінді.

Шаруаларды қолдауға арналған қаржы бағдарламалары туралы Ауыл шаруашылығы министрінің орынбасары Рүстем Құрманов ақпарат берді, деп хабарлайды Altaynews Қазақпарат агенттігіне сілтеме жасап.

– Биыл ауыл шарушылығын қолдауға бөлінген 450 млрд теңгеден бөлек, қосымша ірі жобаларды қолдауға бағытталып 100 млрд теңге қаржы бөлінді. Оның ішінде 65 сүт фермасын құру бар. Қолдау аясында фермерлердің 2,5% кредитті 10 жылға алу мүмкіндігі бар. Одан бөлек, «Ауыл аманаты» атты шағын несие бағдарламасы іске қосылған. Оған да 100 млрд теңге бөлінді. Мақсат – ауыл тұрғындарының табысын арттыру, – деді Рүстем Құрманов Ақмола облысында өтіп жатқан «Jańa Dala» мамандандырылған көрмесінде.

Вице-министрдің мәлімдеуінше, ауыл шаруашылығы – экономиканың локомотиві.

– Ауыл шаруашылығының одан әрі дамуы өндірушілер мен шаруалардың заман сұранысына бейімделіп, оған сай жұмыс істей алуына байланысты. Ол дегеніміз – цифрландыру, заманауи технологияға көшу және трансформация. Біздің министрлік бизнес ортамен бірлесіп жұмыс істегісі келеді. Сол сияқты отандық ауыл шаруашылығы өндірісінің бәсекелестігін арттыру бағытында бірлесіп әрекет етуге дайынбыз, – дейді ол.