Биылғы 20 маусымнан бастап Қазақстанда Президент Қасым-Жомарт Тоқаев 2024 жылғы 19 сәуірде қол қойған вейптерді сатуға және пайдалануға тыйым салатын түзетулер күшіне енеді. Осы орайда профилактикалық рейдтер ұйымдастырылып, вейп-дүкен сатушыларына алдағы тыйым туралы ескертілуде, деп хабарлайды Altainews.kz тілшісі.

«Қазақстанның Балалар қоры» ҚҚ деректері бойынша, 2023 жылы құқық қорғау органдарымен бірлесіп жүргізілген профилактикалық рейдтер барысында 21 жасқа толмағандарға вейп сатудың 14 фактісі тіркелген. Ал биылғы сәуір және мамыр айларында 14 факт анықталды, бұл заңбұзушылықтардың көбейгенін білдіреді.

Жобаның географиясы да кеңейген – 2024 жылы Қазақстанның төрт қаласында – Алматы, Шымкент, Өскемен және Қарағанды қалаларында 137 вейп-дүкен бойынша 24 рейд өтті.

Айта кетсек, қолданыстағы заңнамалық шектеулерге сәйкес, құрамында никотині бар өнімдерді және темекі өнімдерін 21 жасқа толмаған адамдарға сатуға тыйым салынады.