27 ақпан күні жарыс басталуға бір жарым сағат қалғанда қамауға алынған қазақстандық шаңғышы Алексей Полторанин босап шықты, деп хабарлайды Алтайньюс тілшісі.

Бұл туралы «Қазақстан Шаңғы спорт түрлері федерациясының» баспасөз қызметі мәлімдеді.

– Қазір біздің спортшымыз Зеефельд қаласында. Алексей физикалық тұрғыда өзін жақсы сезінеді. Бұдан әрі жарыс жолына шығу-шықпауы кейінірек, оқиғаның мән-жайы анықталғаннан кейін, белгілі болады. Дәл қазір осы бір қорқынышты түстей болған екі күннің артта қалғанына қуаныштымыз, – дейді федерацияның баспасөз хатшысы Самал Наурызова.

Сондай-ақ «Қазақстан Шаңғы спорт түрлері федерациясы» австриялық Kurier басылымының «Алексей Полторанин допинг қабылдағанын мойындап, полицияға түсініктеме берді» деген ақпаратын жоққа шығарды.

– Алексей ресми түрде ешқандай мәлімдеме жасаған жоқ. Бұның барлығы ойдан шығарылған дүниелер, – деді Самал Наурызова.

Естеріңізге сала кетейік, 27 ақпанда австриялық құқық қорғау органдары допингке қарсы ережелерді бұзу туралы халықаралық тергеу шеңберінде қазақстандық шаңғышыны ешқандай түсіндірусіз қамауға алған болатын.

Оразай Жеңісұлы