Семейде ардақты және көп балалы аналарға құрмет көрсетілді, деп хабарлайды Altaynews.kz тілшісі қалалық ішкі саясат бөлімінің мәліметіне сілтеме жасап.
Қалалық ардагерлер кеңесінің төрағасы Амантай Доғалақов пен қалалық жұмыспен қамту және әлеуметтік бағдарламалар бөлімі бастығының орынбасары Қалияс Жұмабай алтынқұрсақты аналардың кеудесіне «Алтын алқа» және «Күміс алқа» белгілерін қадап, кітапшаларды салтанатты түрде табыс етті.
«Сіздер тек балаларыңыз алдында ғана ардақты емессіздер. Сіздер мемлекет алдында үлкен еңбек сіңіріп, мемлекет алдында абыройларыңызды асырдыңыздар», - деп атап өтті А. Доғалақов.
Қалияс Жұмабай құттықтау сөзінде: «Үш жыл ішінде 2040 анаға осындай төсбелгілерді табыс еттік. Елбасының тапсырмасын сіздердің алдарыңызда орындап отырғандарымызға қуаныштымыз», - деді.
«Алтын алқа» Төлеутай Ақбатиева, Светлана Дәуленбаева, Шамшан Теңізбаеваға табыс етілсе, «Күміс алқамен» көп балалы аналар Индира Жақиянова, Рашида Хайбуллина және Алтынсара Карипбаева марапатталды.
Салтанат кезінде ардақты аналарды олардың балалары мен немерелері, қалалық ардагерлер кеңесі мен ақсақалдар кеңесінің өкілдері құттықтады.
