Абай ауданы бойынша тірек ауылдарын дамыту бағдарламасына енген елді мекендердің бірі – Саржал ауылында бұл күндері көркейту, абаттандыру жұмыстары қызу жүргізіліп жатыр.
Ауылда «Туған жерге – тағзым» акциясы аясында мектеп түлектерінің жыл сайын игілікті істер ұйымдастырып, демеушілік жасауы дәстүрге айналған. Таяуда Ш.Тоқжігітов атындағы орта мектептің түлектері (1992 жылы туғандар) ауылдың кіреберісіне құны 1 млн. 200 мың теңге тұратын көркем безендірілген қақпа орнатты.
Мектептің акт залына 100 орындық пен музыкалық орталық сыйлады. Сондай-ақ, сынып кабинеттерін қайта жабдықтау жұмыстары да қолға алынды. Береке мен бірлігі жарасып, татулық пен жомарттық көрсеткен мектеп түлектеріне сары қымызын сапырған саржалдықтар дән риза.
