Қытайдың Харбин қаласында өткен IX Қысқы Азия ойындарында шайбалы хоккейден Қазақстан әйелдер құрамасы Оңтүстік Корея командасын 3:0 есебімен жеңіп, күміс медаль иеленген болатын. Бүгін Өскемен әуежайында жанкүйерлер еліміздің құрамасында өнер көрсеткен жергілікті спортшыларды гүл шоқтарымен құшақ жая қарсы алды, деп хабарлайды Altainews.kz тілшісі.

22 адамнан тұратын Қазақстан құрамасының сапында Шығыс Қазақстан шайбалы хоккей мектебінің 11 тәрбиеленушісі ойнады. Жеңіс туын желбіретіп қайтқан «Торпедо» хоккей клубының мүшелері – София Зубкова, Полина Яковлева, Полина Говтва, Катрин Мескини, Мунира Саяхатқызы, Дильназ Саяхатқызы, Златоцвета Феоктистова жанкүйерлерімен кездесіп, чемпионаттан алған әсерлерімен бөлісті.

Спортшылардың жаттықтырушылары Мария Федоренко мен Дарья Дмитриева шәкірттерінің 8-9 жасынан бері шайбалы хоккеймен айналысып келе жатқанын және болашақтарынан үлкен үміт күтетіндерін атап өтті.

Спортшылар жеңістің қуанышын жанкүйерлерімен бірге бөлісті. Жарыстағы әсерлерімен бөліскен олар алдағы жарыстарда да үздік нәтиже көрсетуге ұмтылатынын айтты. Күміс жүлде иеленген команда мүшелері бұл жетістік олар үшін үлкен мотивация екенін жеткізді.

Жанаргүл Көкенайқызы
Фото: Аяужан Утеулинова